Saturday 24 September 2011

Yaad


Jab yaad tumhari aati hai ,or dil ye bhar bhar jata hai,
Jab har aata jaata jhonka ,tera ehsaas karata hai ,
Har saaya tera lagta hai har khwaab tera ho jata hai ,
Haan ye sach hai aaj bhi dil kar yaad tumhe hi rota hai ,kar yaad tumhe muskata hai ………

Har subah sunehri hoti thi ,har raat tu mera hota tha,
Do dhadkan baatein karti thi,jab jahan ye sara sota tha,
Har ek aahat par aaj bhi man,tujhse milne ko ho aata hai ,
Haan ye sach hai aaj bhi dil kar yaad tumhe hi rota hai ,kar yaad tumhe muskata hai ………..

Har geet mujhe sehlate hai ,jo tumne kabhi sunaye the,
Me sirf tumhari,tumhari tum sirf mere ho,bol sada dohraye the,
Ek ek wo bol aaj kyu kaanto sa chub jata hai??
Haan ye sach hai aaj bhi dil kar yaad tumhe hi rota hai ,kar yaad tumhe muskata hai ………..

Tujhse milne ki khwahish me,har roz bahana hota tha ,
Na man kabu me rehta tha, na dil ka thikana hota tha,
Wo manzar in ankhon ko kyu aaj bhi nam kar jata hai??
Haan ye sach hai aaj bhi dil kar yaad tumhe hi rota hai ,kar yaad tumhe muskata hai ………..

Har shringar adhoora lagta hai ,jo tune kabhi nihara tha,
Wo aaj hua anjana hai ,jo kal tak sirf hamara tha,
Kyu teri tasveer k aage,man sajne ko lalchata hai ??
Haan ye sach hai aaj bhi dil kar yaad tumhe hi rota hai ,kar yaad tumhe muskata hai ………..

Wahi gagan hai ,wahi sadak hai ,ek saath tera hi choot gaya,
Kal tak to log virodhi the,lo aaj khuda bhi rooth gaya ,
Kyu aaj ye man eshwar se bhi ,kuch mangne se hichkata hai ??
Haan ye sach hai aaj bhi dil kar yaad tumhe hi rota hai ,kar yaad tumhe muskata hai ………..

No comments:

Post a Comment