YAADEIN

Chhod chale ham bachpan ko, un galiyon  me us aangan me,

Pedo ki chaya garmi me, baarish ki boonde saawan me,

Haste gaate un lamho ki, bas dhundli si kuch yaadein hai,

Tez shor me jeevan ke, khamosh hui kai baate hai,

Beet gaye kai arse hai, sukh se raato ki neend liye,

Sujjhe jeevan ko bhool ke ham, bad chale ulajhte yauvan me,

Chhod chale ham bachpan ko……………

Kab chhoot gaye wo khel kood, thodi bhi na bhanak hui,

Jaane kab sapne badal gaye, jane kab raahein badal gai,

Kab jeevan par  likh baithe ham, yu kagaz par likhte likhte,

Door nikal gaye sabse kab, jane yu chalte chalte,

Jab aankh khuli to paya khud ko, behti lehro ke jhonko me,

Kuch lamhe beete kal ke hai, kuch aane wale jeevan ke,

Chhod chale ham bachpan ko……………

Jab chot lagi kai seene me, tab rishto ki pehchaan hui,

Khud thokar khane par jana, ab jeevan ki shuruwaat hui,

Ab hasne ko ji karta hai, un bematlab ke jhagdo par,

Girte hain aansu pyaar bhare, jab mil na paate hai kshan bhar,

Dekh rahi ab aankhein hai, sab rang suhane jeevan ke,

Bad chale bichadti yaadon ko, ab bharkar apne daman me,

Chhod chale ham bachpan ko……………

SHAHEED…

KOKH ME WATAN KI WO KHO GAYE ,WO KHO GAYE,

AURO KO NIND BANTKAR, WO SO GAYE,WO SO GAYE,

SHAIYYA PE MAUT KI BHI WO, HAR SAANS PAR JEETE RAHE,

JISMO KE GHAAV DHAANK KAR, HAR DARD KO PEETE RAHE,

JIYE TO TAAL THOK-KAR , WOSHATRU PAR SAWAR THE,

MARE TO UNKE TEZ SE, TAARE UJAAR HO GAYE,

KOKH ME WATAN KI WO KHO GAYE ,WO KHO GAYE…………

BHEED SE NIKAL KE JO, US BHEED KE LIYE LADE,

KHATRE ME JAAN DAALKAR, HAR JAAN KE LIYE LADE,

AANKHON ME JASHN JEET KA, HAR RAAT JO BUNTE RAHE,

HAR DIN KAFAN KO BANDHKAR, SHOOLO PE JO CHALTE RAHE,

BADHE TO IS TARAH KI SARI BANDISHE UKHAD DI,

THAME JAHAN TO VEERTA KE BEEJ KAI BO GAYE,

KOKH ME WATAN KI WO KHO GAYE ,WO KHO GAYE…………

DOR APNE PRIYAJANO KI TOD JO AAGE BADHE,

AANCHAL KO MAA KE BHOOLKAR, ANGAAR PAR CHAL PADE,

NIRAASH WAPAS LAUT GAYI, RAKHIYAAN JINKI KAI,

LAALIMA SINDOOR KI, MAANGON SE KAI UJAD GAI,

AANSU BHARI NIGAAH JO, PARDE KE PEECHE KAID THI,

JO ROYI TO SAMUDRA KE UFAAN TAAR HO GAYE,

KOKH ME WATAN KI WO KHO GAYE ,WO KHO GAYE…………

JINKE TEZ SHORYA KO, HARA SAKI NA MAUT HAI,

JWALA JINKI VEERTA KI, ANT TAK JWALANT HAI,

JO JHEL HAR PRAHAR KO,FAULAD SE DATE RAHE,

BHALE GIRE UTHE MAGAR, WO SHAAN SE KHADE RAHE,

JALE TO AANKH ME WO SABKI, ROSHNI BHARTE RAHE,

BUJHE TO AASMAAN KE TAARE HAZAAR SO GAYE,

KOKH ME WATAN KI WO KHO GAYE ,WO KHO GAYE…………

TAMASHA

KYA KHOOB TAMASHA BANA RAHA,EK AADAM EK INSAAN KA ,

HAR HAAL BECH KAR KAMA RAHA, EK AADAM EK INSAAN KA,

KHUSHI KISI KI BANI KHABAR , BIK RAHA KISI KA DARD KAHI,

ASHKO PE KISI K DAAM LAGE, ASMAT KE DAAG  BAT RAHE KAHI,

CHAND PANKTI BAN KAR UCHAL RAHA, ANG ANG SAMMAN KA,

KYA KHOOB TAMASHA BANA RAHA……..

KOI NYAY MANGTA GUZAR GAYA, KOI JEET RAHA HAR BAZI HAI,

CHARCHA ME KISI KA JANM HAI TO,KAL MAUT KA PALDA BHARI HAI,

TUL RAHE KISI KE ZAKHM KAHI, KOI BECH KISI KI HAAR RAHA,

LUT GAYA KISI KA GHAR AANGAN, BAS PAISO KA VYAPAAR RAHA,

TINKA TINKA UJAD GAYA JEEVAN KE ARMAAN KA,

KYA KHOOB TAMASHA BANA…………….

JUD RAHE KISI KE MEHAL BADE, FAT-TE KAPDO KE DHAAGO SE,

JAHAN PET PAL RAHA LOGON KA, LOGON KE TOOTE KHWAABO SE,

MARA NAHI INSAAN HAI PAR, GHUT GAYA HAI DIL ME DARD KAHI,

KAHNE KO JEETE TO HAI SAB, PAR UTHNE KO JAZBAAT NAI ,

DAFN HO GAYA GHUT GHUT KE, HAR RISHTA AB VISHWAAS KA,

KYA KHOOB TAMASHA BANA………………….

RAAHEIN

KUCH IS TARAH SE AAP HAME RAAH ME MILE,

JHULSI HUI DAGAR KE SARE PHOOL KHIL PADE,

KAB SOCH ME THA AAPKA YU SAATH ME CHALNA,

THAMA JO TUMNE HAANTH, PAG YE AAP CHAL PADE,

ZINDGI KI DAUD ME THEHRE HUE THE HAM,

TATOLNE PAR KHUD KO, BAS VIRANIYAN MILI,

EHSAAS JO TUMHARA EK ROZ CHOO GAYA,

EK DAUR SE RUKE WO SUBAHO SHAAM CHAL PADE,

KHABAR NA THI KI BHOOL KAR, BETHI THI KHUD KO ME,

RANGAT PE MERI WAQT KE, JALE THE PAD GAYE,

KHUSHBOO JO TERE PYAAR KI, CHOONE LAGI MUJHE,

CHEHRE PE SARE RANG, EK SAATH KHIL PADE,

TANHAIYON KA DAUR WO HAMNE BHI DEKHA HAI,

GOONJO ME MEHFIL KI, KHAMOSHI SE GHIR JANA,

LABO PE TUNE NAAM JO, MERA SAJA LIYA,

CHUP SI ZINDGI KE SARE SWAR KHANAK PADE,

DHANK KAR ZAKHMO KO, GHUT KE JEE RAHE THE HAM,

RAATEIN BAYAN KARTI HAI MERE RONE KA SABAB,

JO TUMNE IN ASHKO KO APNE NAAM KAR LIYA,

HANSTI HUI AANKHON SE FIR YE JAAM BEH PADE,

HAM KHOYE IS KADAR THE ZAMANE KI DHUND ME,

NA HOSH WAQT KA THA, NA DIN RAAT KI KHABAR,

RAAHE WAFA KI TUMSE JO YE ROSHNI MILI,

BUJHE HUYE WO SARE FIR CHIRAAG JAL PADE,

FIR CHIRAAG JAL PADE…………………………………..

YAROON DOSTI BADI HI HASEEN HAI...

HAM JAHA BHI RAHE, TUM YAAD ME HOGE,

KHUSHI YA KOI GAM RAHE, HAR HAAL ME HOGE,

YAADEIN WO APNI CHULBULI, HAR DAM JAWAN HONGI,

CHAHE WO KHWAABO ME SAHI, BAATEIN MAGAR HONGI,

SCHOOL KI ATKHELIYA, TEACHER SE VO ULAJHNA,

CHUP REHKAR DAANT SUNNA, FIR BAAD ME UCHALNA,

CANTEEN KI WO LINE, POCKET MONEY NA HONA,

RECESS KE BAAD THAK KAR, HAR CLASS ME WO SONA,

HAR EK SE WO LADNA, FIR HANSNA KHILKHILANA,

DIN BHAR KA HAAL CHAAL, AAPAS ME FIR BATANA,

BEETI HUI WO BAATEIN, GUZRA HUA JAMANA,

BAS YAAD ME RAHEGA, YE APNA DOSTANA,

COLLEGE KA WO CAMPUS, MUSHKIL SE MERA AANA,

HAR BAAT PAR BIGADNA, FIR RUTHNA MANANA,

RAATO KO WO JAGNA, PADNE KA THA BAHANA,

MESSAGE ME RAAT BHAR, LOVE KE KISSE SUNANA,

CHADAR KO KHENCHKAR, MUJHE WO BISTAR SE GIRANA,

BAALO KO KHOLKAR, WO CHOTIYAN BANANA,

MINITOKE LIYE AANA OR GHANTO KA GUZAR JANA,

BEETA HUA WO LAMHA , NA AAYEGA DOBARA,

HAM SAATH CHAL RAHE THE, AB RAHON KO HAI BADALNA,

AB HAM NAI RAHENGE , HAR MOD PAR SAMHALNA,

KUCH CHOOT GAYE TO KYA, NAYE DOST FIR MILENGE,

GUL EK JO GAYA TO ,KAI FOOL FIR KHILENGE,

JAANE PE TUM YU MERE, AB AANKH NAM NA KARNA,

TAARON SA ROSHAN HOKAR, AAKASH ME BIKHARNA,

EK DAUR JEE CHUKE HAI, EK DAUR AB HAI JEENA,

YAADON ME HAMKO RAKHNA, BAS BHULNA KABHI NA,

TOLI SE HAMKO APNI, LENA AB VIDA HAI,

HAM JAA RAHE HAI YAARO , AB SABKO ALVIDA HAI,

AB SABKO ALVIDA HAI…………

VIDAAI

JAANE IN RAAHO ME ,HAM KAL HO NA  HO,

TERI HAR RAAHO ME,HAM MAUJOOD HO NA HO,

PAR TUJHPE HAI YAKEEN, TU SHAAN SE JIYEGA,

JEET SE BHARI HAR ,RAAG ME BAHEGA,

CHAAHE RAHE JAHAN BHI,TU KHUSH RAHE JAHAN ME ,

HANSTE GUDGUDATE ,KHUSH-HAAL SE SAMA ME,

HAM YAADME TUMHARI BESHAK BANE RAHENGE,

HANSI ME TERI KHIL KE ,FIR KHWAAB ME MILENGE,

KISMAT KI HAI BAAT,RAAHON KA MILNA JULNA,

KITNE BHI MAUSAM AAYE, KHUD KO NAHI BADALNA,

VAADA HAI TUMSE MOD PAR, TAKRAYENGE KABHI TO,

DUNIYA HAI ITNI CHOTI, OR REHNA HAI YAHI TO,

KAI PAL TUMHE SHARARTI ,JO YAAD AAYENGE,

TAB NAIN TERE KEEMTI, MOTI GIRAYENGE,

CHUP KAR KAHI ME PYAAR SE, FIR KHILKHILAUNGI,

SUKH DUKH KI APNI YAAD KO ,MAIN GUNGUNAUNGI,

ROYEGI NA TU ROOTH KAR, UMMEED KARTI HOON,

DHOONDE KYU MUJHKO HAR JAGAH ,ME TUJHME HIO REHTI HOON

ME TUJHME HI REHTI HOON…………………..

KHAMOSHI

KHAMOSH KYU YE RAAT HAI ,KYU AAJ HAM SOYE NAHI,

 SHAYAD SAMAYE  KI RET SE,NISHAAN KUCH DHOYE NAHI,

CHUP SI IN  HAWAO ME ,MACHA HUA KYU SHOR HAI,

KAL WAQT KOI OR THA ,KYU WAQT AAJ OR HAI ,

TAKIYE KE NEECHE DAAB KAR, KUCHLE HUYE KUCH YAAD HAI,

AANKHE JO MOOND LE ZARA , TO ZINDA HAR EK KHWAAB HAI,

ARSO KE BAAD HAAL HAI ,KI AAJ HAM ROYE NAHI,

KHAMOSH KYU YE RAAT HAI…………..

                                                      

DETAJO WAQT MOHLATE, TO HAM BHI KOI CHEEZ THE,

MUSKAAN KI TERI ,HAR WAJAH ME HAM SHAREEK THE,

TUM NIKAL GAYE, KI HAM THAHAR GAYE JAWAAB KUCH MILA NAHI,

BADAL HAM HI NA SAKE, PAR TUMSE KUCH GILA NAHI,

JUDA HUI JO RAAH TO, FIR KHWAAB SANJOYE NAHI,

KHAMOSH KYU YE RAAT HAI…………..

KAMI KYA HUI PYAAR ME, SAWAAL KA MALAAL HAI,

YE KAL BHI EK SAWAAL THA, YE AAJ BHI SAWAAL HAI,

TUM CHUP THE KYU HAR BAAT PAR ,PAHELIYO KA DAUR THA,

HAANTHO ME TERA HAANTH THA, PAR TU SHAKS KOI OR THA,

KHAMOSH HAI JO LAB TERE , FIR GEET PIROYE NAHI,

KHAMOSH KYU YE RAAT HAI…………..

JANA HI THA TO , AANKH SE FAREB KYU KARTE RAHE,

TERE KAHE HAR JHOOT PAR , HAM SHAAN SE MARTE RAHE,,

HALAAT AISE KYA HUYE, KI HAM BHI OR HO GAYE,

MON HAM KHADE RAHE , JAANE KAHAN TUM KHO GAYE,

LAGI JO CHOT PYAAR KI, KI ZAKHM FIR DHOYE NAHI ,

KHAMOSH KYU YE RAAT HAI…………..

KADAM

 Kyu ruk rahe hai kadam,rahon ko dekhkar??

Kyu ham behak rahe ,hazaro ko dekhkar??

Jab khud chuni hai raah to, fir kyu viraam hai??

Faisle par tere kyu ,auro ka daav hai ??

Maddham hai teri chaal kyu, pyaaron ko dekhkar??

Kyu ruk rahe……….   

Tere hi haanthon me to , teri kamaan hai ,

Khushiyon bhari ye raah fir kyu, soonsaan hai??

Mana teri is raah par ,kuch choot jayenge,

Par tujhko  parakhne ko, duniya tamaam hai,

Fir aankh teri nam hai kyu, dararo ko dekhkar??

Kyu ruk rahe……….

Kar le tera jo faisla hai, aaankh moond kar,

Manzil kya apni paayega, yu pooch pooch kar??

Har koi tujhko jeene k hunar sikhayega,

Fir teri hare ek soch par, mohar lagayega,

Kya tab badega raah par?? Auro ki soch par,

Kyu ruk rahe……….

Rishton ki dor aaj kyu , kadmo me tang hai??

Chaahaton par sabki kyu ,tu aaj bhang hai??

Kai bhed tujhe raah se, dagmag hilayenge,

Har pag tera marod kar, wo muskurayenge,

Kar de fana har khauff ko, aankhen tarerkar,

Kyu ruk rahe……….

Aankhon me jo manzil ka tune, khwaab bhar liya,

Aadha safar to jeet ka hai ,paar kar liya,

Har mod par kadamo ko ab , ponchna kyu hai??

Kshad bhar bhi ho to, chaahato ko rokna kyu hai ??

Kyu ferna nazar ko ab, kinaron ko dekh kar??

Kyu ruk rahe……….

ARCIS-THE RISING SYMBOL (ANTHEM)

bheed se hat ham ek huye ,ham kaam naya kar jayenge,
haanth mila ham badenge aage,sabko ham samjhayenge,
rang roop ka bhed bhula,jeevan ka raag sunayenge,
jo gire huye hai utha unhe.......
jo pichad gaye hai bada unhe....
ham ek-ek ka haanth thaam ,sabko jeena sikhlayenge,
ham "ARCIS" hai ham takat hai ,har soch nayi kar jayenge.....
har soch nayi kar jayenge .....

sundar hain apna desh bohat par ghaav kai wo jhel raha,

kai bachhe isketadap rahe, rishton me nahi koi mail raha ,

sasak rahi kai saanse hai , khuli hawa me jeene ko ,

jung lagi kai reeto se , jan kai jaano se khel raha,

nasoor koi banne se pehle , ham ghaav sabhi bhar jayenge ,

ham "ARCIS" hai ham takat hai ,har soch nayi kar jayenge.....
har soch nayi kar jayenge .....

aaj desh ki beti bhi ,beton jaisa pad sakti hai ,

Jhansi ki raani k jaise ,har mushkil se lad sakti hai,

Bahu betiyon ko ghar ki ham raah nayi dikhlayenge,

Har haq ka unko gyaan kara ,jeevan me unhe badayenge ,

ham "ARCIS" hai ham takat hai ,har soch nayi kar jayenge.....
har soch nayi kar jayenge .....

bachho se juda hai kal apna ,ye desh unhi se chalna hai ,

nanhe munhe hantho ko hi ,chehre pe roshni malna hai ,

jog hut kar saham gaya bachpan ,chand paiso ke abhaav tale,

na aaj hamara hoga tab ,na kal hamko kuch milna hai ,

choti choti aankhon ko ham udne ka khwaab dikhayenge,

ham "ARCIS" hai ham takat hai ,har soch nayi kar jayenge.....
har soch nayi kar jayenge .....

bhare huye vishwaas se ham , na diga sakega waqt hame ,

badenge aise josh se ham, rukne ki nahi koi chaah rahe ,

har soch badal do jeevan ki , jab neev nayi rakhni hi hai ,

ye desh bana ,parvesh bana ,har reet bani hamse hi hai ,

ghoom ghoom kar rahon me ,ham baat yahi dohrayenge,

ham "ARCIS" hai ham takat hai ,har soch nayi kar jayenge.....
har soch nayi kar jayenge .....